20 June 2006

PATULOY ang pakikibaka ng Pilipinas laban sa kahirapan habang naisulong na ng bansa ang pagpapabuti sa buhay ng mga maralitang Pilipino.

Ito ang ibinunyag ni Vice President Noli 'Kabayan' De Castro sa mga dayuhan na dumalo sa isang dayalogo na bahagi ng pangatlong sesyon ng World Urban Forum (WUF3) na binuo ng U.N. Habitat sa Vancouver, Canada.

Ayon kay De Castro. marami pa ang dapat gawin upang mabago ang pamumuhay ng mga miyembro ng urban poor sa Pilipinas.

Ang dayalogo na tinawag na “Achieving the MDGs: Slum Upgrading and Affordable Housing” ay nagsimula sa isang kuha mula sa 1990 documentary film “On Borrowed Land” na nagsuri sa urban crisis sa Manila dulot ng pagbaha ng mga migrante mula sa probinsiya at pagkalat ng mga squatter sa mga komunidad sa kahabaan ng Manila Bay matapos ang EDSA.

Nang tanungin kung ano ang naging bunga ng mga hakbang ng pamahalaan laban sa kahirapan, sinabi ni De Castro na iba-iba ang naging resulta nito.

“Perhaps the most dramatic symbol is our successful transformation of the erstwhile icon of urban poverty in the Philippines—Smokey Mountain—into a commercial and residential center,” ani De Castro.

Pero iginiit ni De Castro na marami pang kahirapan sa bawat sulok ng bansa ang dapat aksiyunan ng gobyerno.

Ayon kay De Castro, bumaba ang poverty incidence mula 44.2% nuong 1985 hanggang 30.4% noong 2003. Ang bilang ng mahihirap na pamilya ay patuloy na tumataas dahil sa population growth, pagluwas sa urban centers, at limitadong resources para maibigay ang mga pangangailangan ng mga mahihirap.

Ukol sa “voluntary-evictions” na isinagawa ng gobyerno noong nakaraang taon, nilinaw ni De Castro na ang mga demolisyon at pagpapaalis ay naiwasan o naipagpabaling kung ang patuloy na pananatili ng mga informal settlers sa kanilang tinitirahan ay hindi makakadulot ng panganib sa iba o sa kanilang mga sarili.

Sinabi ni De Castro na hanggat maaari, nireregular ng gobyerno ang tenure ng mga informal settlers sa pamamagitan ng presidential proclamations na siyang pinamamahagi bilang lugar ng socialized housing.

Pinaliwanag ni De Castro na ang “voluntary eviction” ay bahagi ng “beneficiary-led and localized” resettlement program para sa mga informal settlers na apektado ng clearing operations para sa North-South Rail Linkage project. Sa kasalukuyan, nagresulta sa maayos at tahimik na pag-relocate ng mga pamilya mula sa Phase 1 ng North Rail alignment ang resettlement program.

Sa pakikipagpulong naman ni De Castro kay U.N. Habitat Executive Director Anna Tibaijuka matapos ang dayalogo, muling sinabi ng pangalawang pangulo na todo ang suporta ng Pilipinas sa paghangad ng layunin ng Habitat agenda maging sa national at international level.

Pinaasa ni De Castro si Tibaijuka na patuloy na itataas ng Pilipinas ang mga prinsipyo ng magkakambal na kampanya sa secure tenure at good urban governance na suportado ng U.N. Habitat. Ilan sa flagship programs sa ilalim ng twin campaigns ay ang Community Mortgage Program at Resettlement Program, partikular ang may 80,000 pamilya sa kahabaan ng mainline railway system.

Nagpahayag ng pag-asa si De Castro na kakayanin ng U.N. Habitat pagalawin ang pondo para sa mga mahahalagang programa tulad ng Slum Upgrading Facility na importante sa full implementation ng Habitat agenda at Millennium Development Goals. Pinaabot din ni De Castro kay Tibaijuka ang Philippine government proposal para maging host ng fifth session ng World Urban Forum ang Manila.

Ang World Urban Forum ay isang biennial gathering na dinadaluhan ng mga taga suporta nito mula sa non-government organizations, community-based organizations, urban professionals at academics, hanggang sa mga gobyerno, local authorities at national at international associations ng local governments.

Umabot sa 15,000 katao mula sa iba't-ibang bansa ang dumalo sa WUF3 na may temang “Our Future: Sustainable Cities – Turning Ideas into Action”. (END)

Ref no. VPMEDIA 06-071