13 June 2006

HINILING kahapon ni Vice-President Noli 'Kabayan' De Castro sa Presidential Electoral Tribunal (PET) na magsagawa ng partial determination sa validity ng election protest ni Loren Legarda base sa resulta ng rebisyon ng mga balota mula sa Cebu at muling pagbibilang ng mga balot returns mula sa Lanao del Sur upang mapabilis ang resolusyon ng naturang protesta.

Sa pamamagitan ng mga abogado ni De Castro na sina Atty. Romulo Macalintal, Atty. Alberto Agra at Atty. Armando Marcelo ng AMPGP Law offices, sinabi ng pangalawang pangulo na karamihan sa kanyang 800,000 vote-lead ay nagmula sa Cebu.

Ayon kay De Castro, nasa 97% complete na ang pagrebisa ng mga balota sa Cebu nuong June 9 at posible na itong matapos ngayong linggo.

Sa kanyang mosyon, ipinakita ni De Castro na ang kanyang lamang kay Legarda ay ni hindi man lang naapektuhan bagamat 90% ng mga balota ng una ay tinanggihan ng dating senadora.

Ipinaliwanag ng mga abogado ni De Castro na ang naturang partial determination ay pinahihintulutan ng PET at maaari nitong iwasan ang pagpresinta ng napakaraming dokumento sa isang bulto at ang pagsusuri ng milyun-milyong balota na inirereklamo na hindi naman posibleng madesisyunan ng PET kaagad.

Ipinanukala ng mga abogado ni De Castro na magkaroon ng preliminary hearing kung saan ang dalawang partido ay pwedeng magsumite ng lahat ng kani-kanilang ebidensiya para sa Cebu at muling pagbibilang ng returns sa Lanao del Sur upang mabigyan dahilan kung bakit dapat o hindi na ipagpatuloy ang protesta.

Ipinaliwanag ng mga abogado na may 7,744 presinto at may mahigit isang milyong balota ang nagamit sa Cebu nuong May 2004 polls. Dahil ang bawat presinto ay nirebisa, may kabuuang 7,744 revision reports ang inihanda kung saan ang bawat report ay may pitong pahina o di kaya'y 54,208 pahina para sa kabuuang revision report. At dahil 20 kopya ang kinakailangang i-file para sa bawat set ng revision report, nangangahulugan na may 1,084,160 piraso ng mga kopya na naturang papeles ang dapat maisumite ni De Castro at ni Legarda sa PET para sa eksaminasyon.

Sa pamamagitan ng ganitong mungkahi, nilinaw ng mga abogado ni De Castro na dahil sa may mahigit isang milyong balota na inirereklamo sa Cebu pa lang at sa dami ng mga dokumento ng ebidensiya na kinakailangang ihanda, matatabunan ang PET ng napakaraming papeles kung saan hindi pa rito kabilang ang mga dokumento at balota kung maghihintay ang PET ng resulta ng rebisyon sa Pampanga at Maguindanao na bahagi ng pilot protested provinces ni Legarda.

"With this proposal, we are confident that the resolution of this election protest could be expedited. The parties would not be pressed for time in photocopying and presenting their respective voluminous evidence. The submission of a great volume of evidence from other provinces would be avoided and the parties could save from expenses for photocopying of these documents and from the daily salaries and allowances of revisors", ani Macalintal at Agra.

Ref no. VPMEDIA 06-067