08 June 2006

HINILING ni Vice President Noli 'Kabayan' De Castro sa mga Pilipino sa Tsina na makipagkapit-bisig sa pamahalaan sa pagsugpo sa kahirapan, ang numero unong suliranin ng bansa sa kasalukuyan.

Sa kanyang talumpati sa ginanap na National Day reception dinner sa JC Mandarin sa Shanghai kahapon upang gunitain ang pagdeklara ng Philippine Independence, inamin ni De Castro na kahirapan ang nananatiling problema ng mga Pilipino.

Subalit sa kabila nito, iginiit ni De Castro na nagbunga naman ang mga pangkaunlarang hakbang ng gobyerno tulad ng mas mataas na kita mula sa expanded value-added tax at patitipid sa gastusin. Ipinagmalaki rin ni De Castro ang mas aktibong stock market, kontroladong inflation at ang positibong pananaw ng mga international rating agencies sa ekonomiya ng bansa.

"The country's macroeconomic figures have never been this good since the Asian financial crisis," ani De Castro.

Ayon sa pangalawang pangulo, kinakailangan pa rin na maramdaman ng mga Pilipino ang benepisyo ng pag-unlad at nangangahulugan ito ng mas maraming daan, tulay, paaralan, ospital bahay, pasilidad para sa transportasyon, trabaho at mga pangunahing pangangailangan at marami pang iba na inaasahan ng mga sambayanang Pilipino mula sa gobyerno.

Pero sinabi ni De Castro sa Filipino community na huwag mag-alala sapagkat nakikipagtulugan naman ang bansa sa pamahalaan ng Tsina upang matupad ang mga nabanggit na mga proyekto.

“I call on all of you, my countrymen, to link arms with us so that we can attain our destiny—a progressive and peaceful Philippines.”

Dinaluhan din ni De Castro ang isang hapunan sa Beijing nuong June 6 na ginawa ni Philippine Ambassador Sonia C. Brady. Sa nasabing okasyon kung saan nakipagpanayam ang pangalawang pangulo sa mga Pilipinong negosyante, propesyonal at estudyante, hinimok niya ang mga ito na tulungan hindi lamang ang kanilang mga sarili kundi pati na rin ang bansa para sa national pride at honor.

Ipinaliwanag ni De Castro na habang may mga naiiwang problema na humahadlang sa kaunlaran ng Pilipinas, tinatanaw niya naman ito bilang senyales ng buhay ng demokrasya.

“I am confident that our people will continue to build on our successes in the years to come. And I hope that you will join us in building a stronger and better Philippines,” he added.

Ref no. VPMEDIA 06-062