06 June 2006

BAGAMAT marami nang investments ang naisulong ng Tsina sa Pilinas, kulang pa ang mga ito at kinakailangan pang madagdagan upang tuluyang mapasigla at maibangon ang ekonomiya ng bansa.

Ito ang naging sentro ng pakikipagtalakayan ni Vice President Noli 'Kabayan' De Castro kina Prime Minister Wen Jiabao at Vice President at Zeng Qinghong ng Peoples' Republic of China nang magtungo ang pangalawang pangulo sa Tsina para sa isang official state visit.

Sa kanyang pakikipag-usap sa dalawang Chinese officials, ipinangako ni De Castro ang tapat na hangarin ng Pilipinas na pagibayuhin ang relasyon ng bansa at Tsina ngunit iginiit din nito na kailangan pa ng mga Pilipino ng tulong sa usaping kalakalan pati na rin sa infrastructure development, agriculture, fisheries, housing at mining.

Ayon kay De Castro, nasa P82.3 milyon ang naging investment ng China sa bansa sa unang tatlong quarter ng 2005 at ito ay 0.14% lamang ng kabuuang foreign investments sa nasabing panahon.

Bukod dito, hinimok din ni De Castro, na siya ring concurrent chairman ng Housing and Urban Development and Coordinating Council (HUDCC), ang mga Intsik na maglagay ng investments ang Tsina sa pabahay ng bansa upang matulungan ang mga Pilipino na makahabol sa malawak na pangangailangan ng pabahay.

Bilang nangangalaga sa paglikas ng informal settlers na apektado ng Rail Linkage Project, siniguro ni Vice President de Castro sa bansang Tsina ang commitment ng bansang Pilipinas na tapusin ang Northrail Project.

Muling pinaabot ni De Castro kay Wen and Zeng ang hiling ni President Gloria Macapagal-Arroyo sa China na magbigay din ng tulong pinansiyal para sa Main Line South project na siyang magpapaayos ng riles papuntang Bicol region.

“This will spur economic and social development and boost tourism in that area.”

Pumirma ang Philippine National Railways (PNR) ng kasunduan sa China National Technical Import Export Corporation (CNTIC) nuong April 2005 para sa Main Line South project.

Sinabi rin ni De Castro kay Premier Wen na may paghahanda na para sa pagbisita ng huli sa Pilipinas sa Disyembre ngayong taon.

Ibinunyag ni De Castro na may posibilidad na magkaroon ng kasunduan sa may 10 lugar ng kooperasyon kabilang dito ang energy, customs, inspection and quarantine gayun na rin ang framework para sa economic partnership sa susunod na 10 taon.

“China is one of our most important partners and neighbors. Our partnership with them has grown by leaps and bounds since the establishment of diplomatic ties in 1975, but there are areas of cooperation that we still need to work on to address our common concerns,” he said.

Ref no. VPMEDIA 06-060