“Walang bundok na mataas para sa Pinoy!”

THE CONQUEROR, Leo Oracion hones his mountaineering skills at Muztagh Ata in Tibet, China, on April 7, making it to its summit of 24,757 feet where he planted the Philippine colors. FIRST PHILIPPINE MT. EVEREST EXPEDITION (Photo and Caption Source: Inq7.net)  5/18/06
 

Ito ang naging pahayag ni Vice President Noli ‘Kabayan’ De Castro matapos marating ng mga Pinoy mountaineers ang Mt. Everest sa Nepal kahapon.

 
Ayon kay De Castro, hindi na umano nakakapagtaka ang tagumpay na nakamit nina Leo Oracion at Erwin Emata sa pagakyat sa pinakamataas na bundok sa mundo dahil marami nang napatunayan ang mga Pinoy na ikinamangha ng buong mundo.

 
Sinabi ni De Castro na ito ang dahilan kung bakit karapat dapat lamang na pagsilbihan ang mga Pilipino at ipagmayabang ng walang alinlangan.

 
“Kahit kailan ay hindi ako nagduda sa kakayahan ng ating lahi. Likas sa mga Pilipino ang pagiging matapang, matiyaga, malakas at may tiwala sa Diyos,” ani De Castro.

 
Ikinagalak naman ni De Castro ang pahayag ng mga mountaineers na ang kanilang pagtungo sa Mt. Everest ay isang maliit na kontribusyon para sa pagkakaisa ng mga Pilipino.

 
Aniya, sana nga ay magsilbing magandang halimbawa ang mga mountaineers, kabilang na rin si Romeo Garduce na parating na rin sa tuktok ng Mt. Everest, para sa lahat ng mamamayan.

 
“Ang mga mountaineers na ito ay dapat magsilbing magandang halimbawa sa lahat ng Pilipino nang sa gayon ay marating na ng Pilipinas hindi lang ang tuktok ng Mt. Everest kundi pati na rin ang inaasam na rurok  ng kaunlaran,” dagdag pa ni De Castro.