Refer to: Ms. Dale Zapata 8332148

CARDINAL ROSALES, PINALIWANAGAN NI KABAYAN

17 May 2006

SINAGOT ni Vice President at Housing and Urban Development Coordinating Council (HUDCC) concurrent chairman Noli ‘Kabayan’ De Castro ang mga apela ni Archbishop Gaudencio Rosales ukol sa umano’y mga suliranin ng mga informal settlers na nailipat sa iba’t-ibang relocation sites.

Sa kanyang liham sa arsobispo, pinaliwanag ni De Castro na habang kanyang batid ang paghihirap ng mga apektadong pamilya, hindi naman aniya tumitigil ang government housing sector sa pghahanap ng solusyon sa kanilang hinagpis.

Bago pa man magsimula ang relokasyon ay nakipag-diyalogo na si De Castro sa mga stakeholders kabilang ang mga multi-lateral organizations, pribadong sector, non-government organizations, peoples’ organizations at mismong ang mga benepisaryo upang maibsan epekto ng relokasyon sa mga naturang pamilya.

Matapos ang malalim na pag-aaral sa mga maaaring gawin, naging kumbinsido si De Castro na ang in-city resettlement at beneficiary-led development ang pinakamagandang paraan para mailipat ang mga pamilya mula sa North at South rails.

“Inutusan ko ang mga ahensiya na aking kinasasakupan na siguraduhing mailantad at mapaliwanag ng mabuti ang paraan na ito sa mga benepisaryo dahil sila ang maaapektuhan ng mga ikikilos,” ani De Castro.

Pinaliwanang ng pangalawang pangulo kahit may iba’t-ibang pananaw, naging maayos ang pakikipagtrabaho ng government shelter sector sa ibat-ibang organisasyon upang matulungan ang mga pamilya. Kabilang dito ang Homeless Peoples’ Organizations sa tulong ni Fr. Atilajano Fajardo, CM ng Vincentian Missionary), ang diocese ng Malolos sa tulong ni Fr. Dennis Espejo at Fr. Vince Reyes, ang Gawad Kalinga sa pangunguna ng executive director nito na si Tony |Meloto at ang UN Habitat.

“Nakakalungkot nga lamang na meron ilang grupo na bumulong sa arsobispo ng mga isyung pinagbali-baliktad, inaccurate, at wala sa tamang konteksto,” ani De Castro.

“Kailan man ay naging pinakamahalaga para sa gobyerno ang kapakanan ng mga nailipat na pamilya. Lahat ng tulong ay aming ibinibigay upang mapagaan ang kanilang kalagayan’” dagdag pa niya.