Ms. Ronadale Zapata
                                                                                                                                               83321148/8334507

                                                                          

 

MGA TAGA-NORTH RAIL PABOR SA RELOKASYON

21 October 2005

Karamihan ng mga pamilya sa North Rail ay nagboluntaryo na para mailipat sa mga resettlement sites, tanda nang malawak na pagtanggap sa isinasagawang relokasyon ng mismong mga taong apektado nito.

 

Ito ang inihayag ni Bise Presidente Noli “Kabayan” De Castro, chairman ng Housing and Urban Development Coordinating Council (HUDCC), at Federico Laxa, General Manager ng National Housing Authority (NHA) sa kanilang ginawang pag-uulat kamakailan sa media at mga people’s organizations.

 

Ayon kay Laxa, sa kabuuang 21,036 pamilyang apektado ng paglilinis sa mga gilid ng riles sa Metro Manila at Bulacan ay 13,843 pamilya na ang nagboluntaryo para sa relokasyon.

 

Nasa 10,707 na ang nailipat sa anim na resettlement sites na tinaguriang Northville 1 hanggang 6.

 

Sa Bulacan, kung saan kasalukuyang  ipinapatupad ng relokasyon matapos ang sa Kalookan, Malabon at Valenzuela, may 6,546 pamilya nang nagboluntaryo at 3,410 na sa mga ito ang nailipat.

 

“Ipinapakita lamang nito ang ganap na pagtanggap ng mga tao sa relocation sites, kumpara sa kasalukuyang nilang tinitirhan,” ani Laxa.

 

Inaasahang mas marami pa ang magboboluntaryo sa mga susunod na araw habang patuloy ang relokasyon at ang pagtutok ng HUDCC at NHA sa kalagayan ng mga apektadong pamilya. Inaasahang matatapos ang relokasyon hanggang Malolos ngayong buwan ng Oktubre.

 

Sinabi ni De Castro na isang dahilan sa magandang pagtanggap ng mga tao sa relokasyon ay ang pagkakaroon nila ng partisipasyon sa pagpili ng mga lugar na paglilipatan.

 

“Ang tawag natin dito ay “beneficiary-led,” kung saan yung mga nire-relocate ay kinokonsulta ng bawat Local Inter-Agency Committee (LIAC), at sila mismo ang pumipili kung saan nila gustong lumipat,” aniya.

 

Idinagdag pa ng Bise Presidente na hindi magkakaroon ng problema sa kanilang hanapbuhay ang mga pamilyang inililipat, lalo na sa mga taga-Bulacan, dahil malapit lamang ang relocation sites na pawang wala pang limang kilometro ang layo mula sa mga komunidad sa riles.

 

“Ito ay in-town o in-city kaya hindi sila malalayo sa kanilang trabaho, kung may trabaho man sila,” ayon kay De Castro.

 

“Pipirma rin kami ng memoradum of agreement sa TESDA, at may mga iba pang private organizations na tumutulong para turuan sila ng livelihood skills, o kaya ay bigyan sila ng puhunan para sa habapbuhay,” dagdag pa niya.

 

Ayon naman kay Mayor Ambrosio Cruz ng Guiguinto, Bulacan, hindi rin dapat ireklamo ang babayaran ng mga benepisyaryo dahil ito ay napakababa kung tutuusin.

 

“Kahit saan kayo umikot, ang bayad sa isang kuwarto lang ay isang libo kada buwan, at iyan ay upa pa lang. Dito ay P200 lamang, magiging iyo pa,” aniya.

 

Ang P200 ay siyang babayaran kada buwan ng bawat pamilya sa unang limang taon, na itataas sa P761.20 kada buwan hanggang sa ika-30 taon.

 

Inayunan ito ni Fr. Nonong Fajardo, Deputy Executive Director ng Homeless Peoples Federation, isa sa mga people’s organizations na aktibong tumutulong sa mga taga-North Rail.

 

Ayon kay Fajardo, ang pagtupad sa obligasyon ng mga benepisyaryo ay nagpapakita ng “dignidad sa pagbabayad.”

 

Idinagdag rin niya na isa pang sikreto sa pagpabor ng mga tao sa relokasyon ay dahil “binabaan sila ng impormasyon at inihanda sila bago dumating yung takdang panahon.”

 

“Binigyan sila ng halaga sa pamamagitan ng pakikipag-usap, hindi lamang ng NHA personnel na yung Linggo ay ginagawang ordinaryong araw, kundi ng mga LGU na talagang nakatutok,” aniya.